غتنظم جمعية أبي رقراق، ما بين 22 و27 شتنبر 2025، الدورة 18 ديال المهرجان الدولي لفيلم المرأة فمدينة سلا.
وغادي تشارك فالمسابقة الرسمية ديال الفيلم الطويل عشرة ديال الأفلام كتمثل أوروبا، أمريكا اللاتينية، آسيا، إفريقيا والعالم العربي.
الأفلام اللي غادي تنافس على جوائز الفيلم الطويل هي: “طحالب مرة” ديال إدريس شويكة (المغرب)، “تيمبي تامبا” ديال آداما بينيتا سو (السنغال، فرنسا)، “ماناس” ديال ماريانا بريناند (البرازيل، البرتغال)، “القمر” ديال كوردوين أيوب (النمسا)، “حبيبي” ديال ليليا إنغولفسدوتر (النرويج)، “عام الأرملة” ديال فيرونيكا ليشكوفا (جمهورية التشيك، سلوفاكيا، كرواتيا)، “خيمة البالونات” ديال ليو مياومياو (الصين)، “ريتا” ديال باز فيغا (إسبانيا)، “الزيزان” ديال إينا فايس (ألمانيا، فرنسا)، و”فتيات الرغبة” ديال برينسيا كار (فرنسا).
هاد الأعمال غادي تنافس على خمسة ديال الجوائز، وهي: الجائزة الكبرى ديال المهرجان، جائزة لجنة التحكيم، جائزة أول عمل، بالإضافة لجائزة أحسن دور نسائي وجائزة أحسن دور رجالي.
أما المسابقة ديال الفيلم الوثائقي، ففيها الأفلام التالية: “قصة عائشة” ديال إليزابيث فيبيرت وتشن وانغ (كندا)، “أنا وياك” ديال زهرة بنحمو ورومي مانا (المغرب، بلجيكا)، “المدينة الأم” ديال ميكي ريدلينغهايس وبيرلي جوبرت (جنوب إفريقيا)، “السور الصغير” ديال إيف دوشمان (بلجيكا)، و “نور عيني” ديال صوفي بريديي (فرنسا).
المهرجان غادي يكرّم حتى الأفلام المغربية، الطويلة والقصيرة، اللي تصاوبات أو تكتبات أو تخرجات أو تنتجات من طرف نساء. فهاد الفقرة اللي سميتها “نافذة على الفيلم المغربي”، غادي تّعطى “جائزة الجمهور الشبابي” للأفلام المغربية (الطويلة والقصيرة) اللي مشاركة. وكاينة أيضا “جائزة الضفة الأخرى” اللي غادي تّعطى لأحسن فيلم مغربي طويل كيعالج وكيدافع على قضايا المرأة.
الأفلام الطويلة المغربية اللي كتنافس على “جائزة الجمهور الشبابي” هي: “404.01” ديال يونس الركاب، “وشم الريح” ديال ليلى التريكي، “البطل” ديال عمر لطفي، “حادة وكريمو” ديال هشام الجباري، و “بنت الفقيه” ديال حميد زيان.
أما فالفئة ديال الأفلام القصيرة المغربية، فكيتنافسو الأفلام التالية: “ما وراء الأمواج” ديال آمنة فرحاتي، “إخوة الرضاعة” ديال كنزة التازي، “الضحية” ديال صفاء الحاجي، “أمم أمثالكم” ديال خولة الركراكي، و”شخصيات” ديال ليلى المصباحي.
أما لجنة التحكيم ديال المسابقة الرسمية للأفلام الطويلة فكتكوّن من الرئيسة، المخرجة ساندرا كوغوت (البرازيل)، ومعاها كاتبة السيناريو والممثلة سناء العلوي (المغرب)، الممثلة تقلا شمعون (لبنان)، المخرجة مريام يو. بيرارا (رواندا)، والمخرجة فاليري ماساديان (فرنسا).
فيما كتشكّل لجنة تحكيم المسابقة الرسمية للأفلام الوثائقية، من الرئيسة، المنتجة آني أوهايون-ديكل (المغرب)، ومعاها المخرجة ناتيفيل بونتالييه (الغابون، بلجيكا)، والسيناريست ليتيسيا كوغلر (فرنسا).
ولجنة تحكيم جائزة الجمهور الشبابي كتكوّن من الرئيسة، الممثلة سلوى زرهان، والمخرجتين نادية بوحيادي وزبيدة الطالعي.