اعتقال الرابر المغربي بايبي گانڭ بتهمة حيازة سلاح ناري فإيطاليا

الرابر المغربي، بايبي گانڭ (Baby Gang)، تشد فميلانو، ولْبارح الأربعاء 10 شتنبر، فإطار واحد التحقيق كتشرف عليه النيابة العامة ديال مدينة ليكو (Lecco). 

زكرياء محب اللي فعمرو 24 عام، لقاو عندو فردي (سلاح ناري) فواحد الشومبر ديال لوطيل فين كان بايت، من بعد ما كان دار حفلة فواحد الكونسير ديال إيميس كيلا (Emis Killa).

بايبي گانڭ كاين حاليا فحبس سان فيتوري (San Vittore)، والتهمة اللي موجهة ليه هي حيازة سلاح بشكل غير قانوني. حسب ما نشرات الصحافة الإيطالية.

وبحسب المحامي ديالو، نيكولو فيكيوني (Niccolò Vecchioni)، هاد السلاح تلقى فواحد التفتيش اللي أمرت بيه النيابة العامة. أما التحقيق، اللي كيقوموا بيه البوليس والنائب العام، كيقولو بلي هو تحقيق كبير وكيتعلق بقضية ديال تجارة الأسلحة.

قبل ما يتشد على قضية السلاح هادي، كان بيبي گانڭ كيتسنى يبدا يدوّز عقوبة ديال “الإشراف الاجتماعي” من بعد ما تحكم عليه بشكل نهائي فشهر مارس اللي فات بعامين و 9 شهور و 10 أيام على قضية إطلاق النار اللي وقعات حدا كورصو كومو (Corso Como)، واحد البلاصة معروفة بالسهرة فميلانو. 

كذلك كيواجه الرابر المغربي الإيطالي، قضايا أخرى، يا إما خدا البراءة فيها أو عندو أحكام مازال ماشي نهائية.